ਉੱਤਰ ਪ੍ਰਦੇਸ਼ ਦੇ ਗੋਰਖਪੁਰ ਤੋਂ ਡਿਜੀਟਲ ਅਰੈਸਟ ਦਾ ਇੱਕ ਬਹੁਤ ਹੀ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਇਕ ਇੰਜੀਨੀਅਰਿੰਗ ਦੀ ਵਿਦਿਆਰਥਣ ਨੂੰ ਫਰਜ਼ੀ ਬੈਂਕ ਅਧਿਕਾਰੀ ਨੇ ਫੋਨ ਕੀਤਾ। ਉਸ ਨੂੰ ਧਮਕਾਇਆ ਅਤੇ ਕਿਹਾ-ਤੂੰ ਕਰਜ਼ਾ ਲਿਆ ਹੈ, ਜੋ ਕਿ ਨਹੀਂ ਚੁਕਾਇਆ। ਅਜਿਹੇ ‘ਚ ਤੁਹਾਡੇ ਖਿਲਾਫ ਮਾਮਲਾ ਦਰਜ ਕੀਤਾ ਗਿਆ ਹੈ। ਫਿਰ ਇੱਕ ਹੋਰ ਵਿਅਕਤੀ ਨੇ ਫਰਜ਼ੀ ਪੁਲਸ ਵਾਲਾ ਦੱਸ ਕੇ ਵੀਡੀਓ ਕਾਲ ਕੀਤੀ।
ਉਸ ਨੇ ਕਿਹਾ- ਤੁਹਾਨੂੰ ਹੈਦਰਾਬਾਦ ਆ ਕੇ ਜ਼ਮਾਨਤ ਲੈਣੀ ਪਵੇਗੀ। ਜ਼ਮਾਨਤ ਲਈ ਪੈਸੇ ਆਨਲਾਈਨ ਭੇਜੋ ਅਤੇ ਛਾਤੀ ‘ਤੇ ਬਣੇ ਟੈਟੂ ਸਮੇਤ ਆਪਣਾ ਪੂਰਾ ਸਰੀਰ ਦਿਖਾਓ। ਤਾਂ ਜੋ ਤੁਹਾਡੀ ਪਹਿਚਾਣ ਹੋ ਸਕੇ। ਵੀਡੀਓ ਬਣਾਉਣ ਤੋਂ ਬਾਅਦ ਵਿਅਕਤੀ ਨੇ ਵਿਦਿਆਰਥਣ ਨੂੰ ਬਲੈਕਮੇਲ ਕਰਨਾ ਸ਼ੁਰੂ ਕਰ ਦਿੱਤਾ। 38,000 ਰੁਪਏ ਵਸੂਲਣ ਤੋਂ ਬਾਅਦ 1 ਲੱਖ ਰੁਪਏ ਹੋਰ ਮੰਗਣ ਲੱਗਾ। ਅਜਿਹੇ ‘ਚ ਵਿਦਿਆਰਥਣ ਨੇ ਪੁਲਸ ਨੂੰ ਸ਼ਿਕਾਇਤ ਕਰ ਕੇ ਮਾਮਲਾ ਦਰਜ ਕਰਵਾਇਆ ਹੈ।
ਮਾਮਲਾ ਕੈਂਟ ਥਾਣਾ ਖੇਤਰ ਦਾ ਹੈ। ਨਾਗਾਲੈਂਡ ਦੇ ਦੀਮਾਪੁਰ ਜ਼ਿਲ੍ਹੇ ਦੀ ਇੱਕ ਵਿਦਿਆਰਥਣ ਗੋਰਖਪੁਰ ਦੇ ਮਦਨ ਮੋਹਨ ਮਾਲਵੀਆ ਇੰਜੀਨੀਅਰਿੰਗ ਕਾਲਜ ਵਿੱਚ ਪੜ੍ਹ ਰਹੀ ਹੈ। ਐਤਵਾਰ ਸਵੇਰੇ 11:30 ਵਜੇ ਉਸ ਦੇ ਮੋਬਾਈਲ ‘ਤੇ ਫ਼ੋਨ ਆਇਆ ਕਿ ਉਸ ਨੇ ਬੈਂਕ ਤੋਂ ਕਰਜ਼ਾ ਲਿਆ ਹੈ ਪਰ ਉਸ ਦੀ ਅਦਾਇਗੀ ਨਹੀਂ ਕੀਤੀ। ਇਸ ਕਾਰਨ ਤੁਹਾਡੇ ਖਿਲਾਫ ਮਾਮਲਾ ਦਰਜ ਕੀਤਾ ਗਿਆ ਹੈ। ‘ਮੈਂ SBI ਤੋਂ ਬੋਲ ਰਿਹਾ ਹਾਂ। 1 ਲੱਖ ਰੁਪਏ ਦੀ ਮੂਲ ਰਕਮ ਅਤੇ ਵਿਆਜ ਤੁਰੰਤ ਅਦਾ ਕਰੋ, ਨਹੀਂ ਤਾਂ ਤੁਹਾਨੂੰ ਗ੍ਰਿਫਤਾਰ ਕਰ ਲਿਆ ਜਾਵੇਗਾ’।
ਇਹ ਕਹਿ ਕੇ ਵਿਅਕਤੀ ਨੇ ਫ਼ੋਨ ਕੱਟ ਦਿੱਤਾ। ਫਿਰ ਕੁਝ ਸਮੇਂ ਬਾਅਦ ਵਿਦਿਆਰਥਣ ਨੂੰ ਵਟਸਐਪ ਕਾਲ ਆਈ। ਇਸ ਵਿੱਚ ਦਿਖਾਈ ਦੇਣ ਵਾਲਾ ਵਿਅਕਤੀ ਪੁਲਸ ਦੀ ਵਰਦੀ ਵਿੱਚ ਸੀ। ਉਨ੍ਹਾਂ ਕਿਹਾ ਕਿ ਤੁਹਾਡੇ ਖ਼ਿਲਾਫ਼ ਹੈਦਰਾਬਾਦ ਵਿੱਚ ਐਫਆਈਆਰ ਦਰਜ ਕੀਤੀ ਗਈ ਹੈ। ਤੁਸੀਂ ਜਲਦੀ ਤੋਂ ਜਲਦੀ ਇੱਥੇ ਆਓ ਅਤੇ ਆਪਣੀ ਜ਼ਮਾਨਤ ਕਰਵਾ ਲਓ, ਨਹੀਂ ਤਾਂ ਪੁਲਸ ਇੱਥੋਂ ਜਾ ਕੇ ਤੁਹਾਨੂੰ ਗ੍ਰਿਫਤਾਰ ਕਰ ਲਵੇਗੀ।
ਵਿਦਿਆਰਥਣ ਨੇ ਦੱਸਿਆ ਕਿ ਮੈਂ ਕੋਈ ਕਰਜ਼ਾ ਨਹੀਂ ਲਿਆ ਹੈ। ਮੇਰੇ ਖਿਲਾਫ ਫਿਰ ਕੇਸ ਕਿਉਂ ਦਰਜ ਕੀਤਾ ਗਿਆ? ਉਸ ਵਿਅਕਤੀ ਨੇ ਕਿਹਾ ਕਿ ਮੈਨੂੰ ਇਹ ਸਭ ਕੁਝ ਨਹੀਂ ਪਤਾ। ਤੁਹਾਡੇ ਖਿਲਾਫ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਤੁਹਾਡੀ ਗੱਲ ਸੱਚ ਹੈ ਜਾਂ ਬੈਂਕ ਵਾਲਿਆਂ ਦੀ, ਇਹ ਤਾਂ ਬਾਅਦ ਵਿੱਚ ਹੀ ਪਤਾ ਲੱਗੇਗਾ ਜਦੋਂ ਤੁਹਾਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ।
ਛਾਤੀ ‘ਤੇ ਬਣਿਆ ਟੈਟੂ ਦਿਖਾਉਣ ਦੀ ਮੰਗ
ਇਹ ਸੁਣ ਕੇ ਵਿਦਿਆਰਥਣ ਡਰ ਗਈ। ਉਸ ਨੇ ਆਪਣੀ ਮਜਬੂਰੀ ਦੱਸਦਿਆਂ ਕਿਹਾ- ਇੰਨੀ ਜਲਦੀ ਉੱਥੇ ਆਉਣਾ ਮੁਸ਼ਕਲ ਹੈ। ਇਸ ਲਈ ਹੈਦਰਾਬਾਦ ਤੋਂ ਫੋਨ ਕਰਨ ਵਾਲੇ ਵਿਅਕਤੀ ਨੇ ਕਿਹਾ ਕਿ ਤੁਹਾਨੂੰ ਆਪਣੀ ਜ਼ਮਾਨਤ ਆਨਲਾਈਨ ਕਰਵਾ ਲੈਣੀ ਚਾਹੀਦੀ ਹੈ। ਇਸ ਦੇ ਲਈ 38000 ਰੁਪਏ ਖਰਚ ਹੋਣਗੇ। ਰਕਮ ਤੁਰੰਤ ਟਰਾਂਸਫਰ ਕਰੋ। ਵਿਦਿਆਰਥੀ ਨੇ ਉਸ ਦੇ ਕਹਿਣ ਅਨੁਸਾਰ ਪੈਸੇ ਟਰਾਂਸਫਰ ਕਰ ਦਿੱਤੇ। ਇਸ ਤੋਂ ਬਾਅਦ ਉਸ ਵਿਅਕਤੀ ਨੇ ਕਿਹਾ ਕਿ ਆਪਣੀ ਛਾਤੀ ‘ਤੇ ਬਣਿਆ ਟੈਟੂ ਦਿਖਾਓ ਕਿਉਂਕਿ ਇਸ ਨੂੰ ਦੇਖੇ ਬਿਨਾਂ ਤੁਹਾਡੀ ਪਛਾਣ ਨਹੀਂ ਹੋ ਸਕੇਗੀ ਅਤੇ ਤੁਹਾਡੀ ਜ਼ਮਾਨਤ ਨਹੀਂ ਹੋ ਸਕੇਗੀ। ਅਜਿਹੀ ਸਥਿਤੀ ਵਿੱਚ ਪੁਲਸ ਤੁਹਾਡੇ ਖਿਲਾਫ ਕਾਰਵਾਈ ਕਰੇਗੀ।
ਵਿਦਿਆਰਥਣ ਨੇ ਆਪਣੇ ਕੱਪੜੇ ਉਤਾਰ ਦਿੱਤੇ
ਮਰਦਾ ਕੀ ਨਾ ਕਰਦਾ? ਵਿਦਿਆਰਥਣ ਨੇ ਵਿਅਕਤੀ ਦੇ ਕਹਿਣ ‘ਤੇ ਆਪਣੇ ਕੱਪੜੇ ਉਤਾਰ ਦਿੱਤੇ। ਇਸ ਤੋਂ ਬਾਅਦ ਫੋਨ ਕੱਟ ਦਿੱਤਾ ਗਿਆ। ਤੁਰੰਤ ਹੀ ਦੁਬਾਰਾ ਕਾਲ ਆਈ ਅਤੇ ਉਹੀ ਵਿਅਕਤੀ ਸਾਹਮਣੇ ਸੀ। ਉਸ ਨੇ ਕਿਹਾ ਕਿ ਤੁਹਾਡੀ ਅਸ਼ਲੀਲ ਵੀਡੀਓ ਬਣਾ ਲਈ ਗਈ ਹੈ। ਤੁਸੀਂ ਤੁਰੰਤ ₹100000 ਹੋਰ ਭੇਜੋ, ਨਹੀਂ ਤਾਂ ਇਹ ਪੂਰੀ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਜਾਵੇਗੀ। ਤੁਸੀਂ ਕਿਤੇ ਵੀ ਆਪਣਾ ਮੂੰਹ ਨਹੀਂ ਦਿਖਾ ਸਕੋਗੇ। ਤੁਸੀਂ ਆਪਣੇ ਪਰਿਵਾਰ ਨੂੰ ਕੀ ਜਵਾਬ ਦਿਓਗੇ? ਜਦੋਂ ਵਿਦਿਆਰਥਣ ਨੇ ਪੈਸੇ ਦੇਣ ਤੋਂ ਅਸਮਰੱਥਾ ਪ੍ਰਗਟਾਈ ਤਾਂ ਸਾਹਮਣੇ ਵਾਲੇ ਵਿਅਕਤੀ ਨੇ ਉਸ ਨੂੰ ਨਤੀਜੇ ਭੁਗਤਣ ਲਈ ਤਿਆਰ ਰਹਿਣ ਦੀ ਧਮਕੀ ਦਿੱਤੀ। ਉਸਨੇ ਫੋਨ ਬੰਦ ਕਰ ਦਿੱਤਾ। ਘਬਰਾ ਕੇ ਵਿਦਿਆਰਥਣ ਨਜ਼ਦੀਕੀ ਥਾਣੇ ਪਹੁੰਚ ਗਈ।
ਐਸਪੀ ਸਿਟੀ ਅਭਿਨਵ ਤਿਆਗੀ ਨੇ ਕਿਹਾ- ਵਿਦਿਆਰਥਣ ਦੀ ਸ਼ਿਕਾਇਤ ‘ਤੇ ਪੁਲਸ ਨੇ ਦੋਨਾਂ ਅਣਪਛਾਤੇ ਨੰਬਰਾਂ ਦੇ ਖਿਲਾਫ ਮਾਮਲਾ ਦਰਜ ਕਰ ਲਿਆ ਹੈ।
