ਪੰਜਾਬੀ ਮਿਊਜ਼ਿਕ ਤੇ ਗਾਣਿਆਂ ਦੇ ਦੀਵਾਨੇ ਦੇਸ਼ ‘ਚ ਹੀ ਨਹੀਂ ਸਗੋਂ ਪੂਰੀ ਦੁਨੀਆ ‘ਚ ਹਨ। ਪੰਜਾਬੀ ਗੀਤ ਹਰ ਦੇਸ਼ ‘ਚ ਸੁਣੇ ਜਾਂਦੇ ਹਨ। ਇਸ ਦਾ ਸਬੂਤ ਹੈ ਵਿਦੇਸ਼ੀ ਲੋਕਾਂ ਦੇ ਵੀਡੀਓਜ਼ ਜੋ ਉਹ ਪੰਜਾਬੀ ਗੀਤਾਂ ‘ਤੇ ਬਣਾਉਂਦੇ ਹਨ। ਹਾਲ ਹੀ ਅਮਰੀਕਨ ਗੋਰਿਆਂ ਦਾ ਇੱਕ ਵੀਡੀਓ ਵਾਇਰਲ ਹੋਇਆ ਸੀ ਜਿਸ ਵਿੱਚ ਉਹ ‘ਕਾਲਾ ਚਸ਼ਮਾ’ ਗਾਣੇ ਤੇ ਡਾਂਸ ਕਰ ਰਹੇ ਸੀ।
ਇਸ ਦੇ ਨਾਲ ਨਾਲ ਹਾਲ ਹੀ ਕਿਲੀ ਪੌਲ ਵੱਲੋਂ ਐਮੀ ਵਿਰਕ ਦੇ ਸੁਪਰਹਿੱਟ ਗਾਣੇ ‘ਚੰਨ ਸਿਤਾਰੇ’ ‘ਤੇ ਰੀਲ ਬਣਾਈ ਗਈ। ਜਿਸ ਨੂੰ ਹੁਣ ਤੱਕ ਲੱਖਾਂ ਲਾਈਕ ਮਿਲ ਚੁੱਕੇ ਹਨ। ਅਜਿਹੀਆਂ ਹੋਰ ਕਈ ਉਦਾਹਰਨਾਂ ਹਨ, ਜਿਨ੍ਹਾਂ ਤੋਂ ਪਤਾ ਲੱਗਦਾ ਹੈ ਕਿ ਪੰਜਾਬੀ ਗੀਤਾਂ ਦੇ ਦੀਵਾਨੇ ਪੂਰੀ ਦੁਨੀਆ ‘ਚ ਹਨ। ਤਾਂ ਅੱਜ ਅਸੀਂ ਤੁਹਾਨੂੰ ਦੱਸਣ ਜਾ ਰਹੇ ਹਾਂ ਕਿ ਸਾਲ 2022 ‘ਚ ਕਿਹੜੇ ਪੰਜਾਬੀ ਕਲਾਕਾਰ ਸਭ ਤੋਂ ਅਮੀਰ ਰਹੇ। ਇੱਥੇ ਦੇਖੋ ਲਿਸਟ:
ਸ਼ੈਰੀ ਮਾਨ (80 ਮਿਲੀਅਨ ਡਾਲਰ)
ਸ਼ੈਰੀ ਮਾਨ ਦਾ ਨਾਂ ਇਸ ਲਿਸਟ ‘ਚ ਟੌਪ ‘ਤੇ ਹੈ। ਜੀ ਹਾਂ, ਤੁਹਾਨੂੰ ਸ਼ਾਇਦ ਯਕੀਨ ਨਹੀਂ ਹੋਵੇਗਾ ਕਿ ਸ਼ੈਰੀ ਮਾਨ ਦੇ ਪੂਰੀ ਦੁਨੀਆ ‘ਚ ਜ਼ਬਰਦਸਤ ਫੈਨਜ਼ ਹਨ। ਹਾਲ ਹੀ ਚ ਗਾਇਕ ਨੇ ਕਰੋੜਾਂ ਦੀ ਕੀਮਤ ਵਾਲੀ ਟੈਸਲਾ ਕਾਰ ਵੀ ਖਰੀਦੀ ਹੈ। ਇਸ ਤੋਂ ਤੁਸੀਂ ਖੁਦ ਹੀ ਅੰਦਾਜ਼ਾ ਲਗਾ ਸਕਦੇ ਹੋ ਕਿ ਉਹ ਕਿੰਨਾ ਅਮੀਰ ਹੈ। ਇੱਕ ਰਿਪੋਰਟ ਦੇ ਮੁਤਾਬਕ 2022 ‘ਚ ਸ਼ੈਰੀ ਮਾਨ ਦੀ ਕੁੱਲ ਜਾਇਦਾਦ 80 ਮਿਲੀਅਨ ਡਾਲਰ ਯਾਨਿ 663 ਕਰੋੜ ਰੁਪਏ ਦੱਸੀ ਜਾਂਦੀ ਹੈ। ਇਹੀ ਨਹੀਂ ਕਿ ਗਾਇਕ ਦੀ ਕਮਾਈ ਦਾ ਸਾਧਨ ਸਿਰਫ਼ ਗਾਇਕੀ ਹੀ ਹੈ, ਸਗੋਂ ਸ਼ੈਰੀ ਸੋਸ਼ਲ ਮੀਡੀਆ ਤੋਂ ਵੀ ਤਗੜੀ ਕਮਾਈ ਕਰਦੇ ਹਨ। ਸ਼ੈਰੀ ਦੇ ਕਰੀਅਰ ਬਾਰੇ ਗੱਲ ਕਰੀਏ ਤਾਂ ਗਾਇਕ ਨੇ ਸਿਵਲ ਇੰਜਨੀਅਰਿੰਗ ਦੀ ਪੜ੍ਹਾਈ ਕੀਤੀ ਹੋਈ ਹੈ। ਇਸ ਦੇ ਨਾਲ ਨਾਲ 2011 ‘ਚ ਸ਼ੈਰੀ ਦੀ ਐਲਬਮ ‘ਯਾਰ ਅਣਮੁੱਲੇ’ ਨੇ ਉਨ੍ਹਾਂ ਨੂੰ ਜ਼ਬਰਦਸਤ ਪ੍ਰਸਿੱਧੀ ਦਿੱਤੀ। ਉਨ੍ਹਾਂ ਦੇ ਗਾਣਿਆਂ ‘ਤੇ ਮਿਲੀਅਨ ਦੇ ਵਿੱਚ ਵਿਊਜ਼ ਹੁੰਦੇ ਹਨ।
ਗੁਰਦਾਸ ਮਾਨ (50-55 ਮਿਲੀਅਨ ਡਾਲਰ)
ਗੁਰਦਾਸ ਮਾਨ ਦਾ ਨਾਂ ਇਸ ਲਿਸਟ ‘ਚ ਦੂਜੇ ਨੰਬਰ ‘ਤੇ ਹੈ। ਗੁਰਦਾਸ ਮਾਨ ਇੰਡਸਟਰੀ ਦੇ ਦੂਜੇ ਸਭ ਤੋਂ ਅਮੀਰ ਗਾਇਕ ਹਨ। ਉਨ੍ਹਾਂ ਨੂੰ ਪੰਜਾਬੀ ਗਾਇਕੀ ਦਾ ਬਾਬਾ ਬੋਹੜ ਕਿਹਾ ਜਾਂਦਾ ਹੈ। ਉਹ ਤਕਰੀਬਨ 4 ਦਹਾਕਿਆਂ ਤੋਂ ਪਾਲੀਵੁੱਡ ‘ਤੇ ਰਾਜ ਕਰ ਰਹੇ ਹਨ। ਉਨ੍ਹਾਂ ਦੀ ਜਾਇਦਾਦ ਦੀ ਗੱਲ ਕੀਤੀ ਜਾਏ ਤਾਂ 2022 ‘ਚ ਉਨ੍ਹਾਂ ਦੀ ਕੁੱਲ ਜਾਇਦਾਦ 50-55 ਮਿਲੀਅਨ ਡਾਲਰ ਯਾਨਿ 450 ਕਰੋੜ ਰੁਪਏ ਹੈ। ਗੁਰਦਾਸ ਮਾਨ ਦੀ ਕਮਾਈ ਦਾ ਸਾਧਨ ਗਾਇਕੀ, ਸੋਸ਼ਲ ਮੀਡੀਆ, ਤੇ ਸਟੇਜ ਸ਼ੋਅਜ਼ ਦੱਸੇ ਜਾਂਦੇ ਹਨ।
ਜੈਜ਼ੀ ਬੀ (50 ਮਿਲੀਅਨ ਡਾਲਰ)
ਜਲੰਧਰ ਦੀ ਜੰਮੇ ਤੇ ਕੈਨੇਡਾ ‘ਚ ਪਲੇ ਜੈਜ਼ੀ ਬੀ ਆਪਣੇ ਜ਼ਮਾਨੇ ਦੇ ਇੰਡਸਟਰੀ ਦੇ ਟੌਪ ਗਾਇਕ ਰਹੇ ਹਨ। ਇਸ ਸਮੇਂ ਜੈਜ਼ੀ ਬੀ ਕੈਨੇਡਾ ਦੇ ਬ੍ਰਿਟੀਸ਼ ਕੋਲੰਬੀਆ ਸੂਬੇ ਦੇ ਸਰੀ ਸ਼ਹਿਰ ਦੇ ਵਸਨੀਕ ਹਨ। ਉਨ੍ਹਾਂ ਦੀ ਪਹਿਲੀ ਐਲਬਮ ‘ਘੁੱਗੀਆਂ ਦਾ ਜੋੜਾ’ ਸਾਲ 1993 ‘ਚ ਆਈ ਸੀ। ਇੱਥੋਂ ਤੱਕ ਕਿ ਬਾਲੀਵੁੱਡ ਦੇ ਦਿੱਗਜ ਕਲਾਕਾਰ ਜੌਨ ਅਬਰਾਹਮ ਨੇ ਆਪਣਾ ਕਰੀਅਰ ਜੈਜ਼ੀ ਬੀ ਦੇ ਗਾਣੇ ‘ਸੂਰਮਾ’ ਤੋਂ ਸ਼ੁਰੂ ਕੀਤਾ ਸੀ। ਜੈਜ਼ੀ ਬੀ ਦੀ ਜਾਇਦਾਦ ਦੀ ਗੱਲ ਕੀਤੀ ਜਾਵੇ ਤਾਂ ਉਹ 50 ਮਿਲੀਅਨ ਡਾਲਰ ਯਾਨਿ 409 ਕਰੋੜ ਰੁਪਏ ਜਾਇਦਾਦ ਦੇ ਮਾਲਕ ਹਨ। ਉਹ ਫਿਲਮ ‘ਸਨੋਮੈਨ’ ਨਾਲ ਪੰਜਾਬੀ ਫਿਲਮਾਂ ‘ਚ ਵਾਪਸੀ ਕਰ ਰਹੇ ਹਨ।
ਯੋ ਯੋ ਹਨੀ ਸਿੰਘ (25 ਮਿਲੀਅਨ ਡਾਲਰ)
ਯੋ ਯੋ ਹਨੀ ਸਿੰਘ ਉਹ ਕਲਾਕਾਰ ਹੈ, ਜਿਸ ਨੇ ਪੰਜਾਬੀ ਇੰਡਸਟਰੀ ‘ਚ ਸਭ ਤੋਂ ਪਹਿਲਾਂ ਰੈਪ ਦੀ ਸ਼ੁਰੂਆਤ ਕੀਤੀ ਸੀ। ਉਹ ਪੰਜਾਬੀ ਇੰਡਸਟਰੀ ਦੇ ਸਭ ਤੋਂ ਪ੍ਰਸਿੱਧ ਗਾਇਕ ਤੇ ਰੈਪਰਾਂ ‘ਚੋਂ ਇੱਕ ਹੈ। ਇਹੀ ਨਹੀਂ ਹਨੀ ਸਿੰਘ ਨੇ ਬਾਲੀਵੁੱਡ ‘ਚ ਵੀ ਕਾਫੀ ਨਾਮ ਕਮਾਇਆ ਸੀ। ਉਸ ਦੇ ਕਈ ਗਾਣੇ ਏਸ਼ੀਅਨ ਬਿਲਬੋਰਡ ਚਾਰਟਾਂ ‘ਚ ਟੌਪ ‘ਤੇ ਰਹੇ ਹਨ। ਇੱਕ ਰਿਪੋਰਟ ਮੁਤਾਬਕ ਹਨੀ ਸਿੰਘ ਕੁੱਲ 25 ਮਿਲੀਅਨ ਡਾਲਰ ਯਾਨਿ 204 ਕਰੋੜ ਦੀ ਜਾਇਦਾਦ ਦਾ ਮਾਲਕ ਹੈ। ਉਹ ਗਾਇਕੀ ਦੇ ਨਾਲ ਨਾਲ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ਤੋਂ ਵੀ ਮੋਟੀ ਕਮਾਈ ਕਰਦਾ ਹੈ।
ਦਿਲਜੀਤ ਦੋਸਾਂਝ (20 ਮਿਲੀਅਨ ਡਾਲਰ)
ਦਿਲਜੀਤ ਦੋਸਾਂਝ ਇੰਡਸਟਰੀ ਦੇ ਟੌਪ ਗਾਇਕ ਹੀ ਨਹੀਂ, ਬਲਕਿ ਬੇਹਤਰੀਨ ਅਦਾਕਾਰ ਵੀ ਹਨ। ਉਹ ਜਿੰਨੀ ਵਧੀਆ ਗਾਇਕੀ ਕਰਦੇ ਹਨ, ਉਨੀਂ ਹੀ ਵਧੀਆ ਉਨ੍ਹਾਂ ਦੀ ਐਕਟਿੰਗ ਹੈ। ਦਿਲਜੀਤ ਵੀ ਉਨ੍ਹਾਂ ਪੰਜਾਬੀ ਸਟਾਰਜ਼ ਵਿੱਚੋਂ ਇੱਕ ਹਨ, ਜਿਨ੍ਹਾਂ ਨੇ ਪਾਲੀਵੁੱਡ ਦੇ ਨਾਲ ਨਾਲ ਬਾਲੀਵੁੱਡ ‘ਚ ਵੀ ਜ਼ਬਰਦਸਤ ਨਾਮ ਕਮਾਇਆ ਹੈ। ਇੱਕ ਰਿਪੋਰਟ ਮੁਤਾਬਕ 2022 ;ਚ ਦਿਲਜੀਤ ਦੋਸਾਂਝ ਦੀ ਕੁੱਲ ਜਾਇਦਾਦ 20 ਮਿਲੀਅਨ ਡਾਲਰ ਯਾਨਿ 163 ਕਰੋੜ ਰੁਪਏ ਹੈ।
