50 ਕਰੋੜ ਦਾ ਕੁੱਤਾ ਖਰੀਦਣ ਵਾਲੇ ਦੇ ਘਰ ਪਹੁੰਚੀ ED, ਹੈਰਾਨ ਕਰਨ ਵਾਲੇ ਖ਼ੁਲਾਸੇ

 ਬੰਗਲੁਰੂ ਨਿਵਾਸੀ ਸਤੀਸ਼ (Satish S) ਦੀਆਂ 50 ਕਰੋੜ ਰੁਪਏ ਦੇ ਕੁੱਤੇ ਨਾਲ ਤਸਵੀਰਾਂ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋਣ ਤੋਂ ਬਾਅਦ ਇਨਫੋਰਸਮੈਂਟ ਡਾਇਰੈਕਟੋਰੇਟ (ED) ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।  ਸਤੀਸ਼ ਨੇ ਦਾਅਵਾ ਕੀਤਾ ਸੀ ਕਿ ਉਸਨੇ ਕੈਡਾਬੋਮ ਓਕਾਮੀ (Cadabomb Okami) ਨਾਮਕ ਇੱਕ ਦੁਰਲੱਭ ਨਸਲ ਦਾ ਕੁੱਤਾ 50 ਕਰੋੜ ਰੁਪਏ ਵਿੱਚ ਖਰੀਦਿਆ ਸੀ।

ਸੋਸ਼ਲ ਮੀਡੀਆ ‘ਤੇ ਉਸ ਦੀਆਂ ਤਸਵੀਰਾਂ ਵਾਇਰਲ ਹੋਣ ਤੋਂ ਬਾਅਦ ਇਨਫੋਰਸਮੈਂਟ ਡਾਇਰੈਕਟੋਰੇਟ ਨੂੰ 50 ਕਰੋੜ ਰੁਪਏ ਵਿੱਚ ਬਘਿਆੜ ਕੁੱਤੇ (Wolf Dog) ਦੀ ਕਥਿਤ ਖ਼ਰੀਦ ਪਿੱਛੇ ਹਵਾਲਾ ਲੈਣ-ਦੇਣ ਜਾਂ ਪੈਸੇ ਦੇ ਗੈਰ-ਕਾਨੂੰਨੀ ਪ੍ਰਵਾਹ ਦਾ ਦੋਸ਼ ਲਗਾਉਣ ਵਾਲੀ ਸ਼ਿਕਾਇਤ ਮਿਲੀ। ਹਾਲਾਂਕਿ, ਸਤੀਸ਼ ਨੇ ਇਨ੍ਹਾਂ ਦੋਸ਼ਾਂ ਤੋਂ ਇਨਕਾਰ ਕੀਤਾ ਹੈ ਤੇ ਦਾਅਵਾ ਕੀਤਾ ਹੈ ਕਿ ਉਸਨੇ ਕੁੱਤੇ ਨਾਲ ਤਸਵੀਰਾਂ ਹੀ ਖਿੱਚੀਆਂ ਸਨ। ਜਾਂਚ ਏਜੰਸੀ ਨੇ ਸਤੀਸ਼ ਨੂੰ ਮਾਮਲੇ ਦੀ ਜਾਂਚ ਲਈ ਕੁੱਤੇ ਨੂੰ ਪੇਸ਼ ਕਰਨ ਲਈ ਕਿਹਾ ਹੈ। ਹਾਲਾਂਕਿ, ਉਸਨੇ ਕਥਿਤ ਤੌਰ ‘ਤੇ ਅਧਿਕਾਰੀਆਂ ਨੂੰ ਦੱਸਿਆ ਕਿ ਕੁੱਤਾ ਇਸ ਸਮੇਂ ਉਸਦੇ ਦੋਸਤ ਕੋਲ ਹੈ।

ਕੌਣ ਹੈ ਸਤੀਸ਼?

51 ਸਾਲਾ ਸਤੀਸ਼ ਆਪਣੇ ਦੁਰਲੱਭ ਪਾਲਤੂ ਜਾਨਵਰਾਂ ਦੇ ਪ੍ਰਜਨਨ ਕਾਰੋਬਾਰ ਲਈ ਜਾਣੇ ਜਾਂਦੇ ਹਨ। ਹਾਲ ਹੀ ਵਿੱਚ, ਉਸਨੇ ਸੋਸ਼ਲ ਮੀਡੀਆ ‘ਤੇ ਇੱਕ ਕੁੱਤੇ ਨਾਲ ਇੱਕ ਤਸਵੀਰ ਸਾਂਝੀ ਕੀਤੀ ਜੋ ਕਿ ਇੱਕ ਜੰਗਲੀ ਬਘਿਆੜ ਤੇ ਇੱਕ ਕਾਕੇਸ਼ੀਅਨ ਸ਼ੈਫਰਡ ਦਾ ਇੱਕ ਦੁਰਲੱਭ ਹਾਈਬ੍ਰਿਡ ਹੈ। ਰਿਪੋਰਟ ਦੇ ਅਨੁਸਾਰ, ਉਸਨੇ ਫਰਵਰੀ ਵਿੱਚ ਇੱਕ ਦਲਾਲ ਰਾਹੀਂ ਜਾਨਵਰ ਖਰੀਦਿਆ ਸੀ। ਦੁਨੀਆ ਦੇ ਸਭ ਤੋਂ ਦੁਰਲੱਭ ਕੁੱਤੇ ਵਜੋਂ ਜਾਣਿਆ ਜਾਂਦਾ, ਓਕਾਮੀ ਸਿਰਫ਼ ਅੱਠ ਮਹੀਨੇ ਦਾ ਹੈ, ਉਸਦਾ ਭਾਰ 75 ਕਿਲੋਗ੍ਰਾਮ ਹੈ ਅਤੇ ਉਸਦੀ ਉਚਾਈ 30 ਇੰਚ ਹੈ। ਸਤੀਸ਼ ਨੇ ਕਿਹਾ, ‘ਇਹ ਕੁੱਤੇ ਦੀ ਇੱਕ ਬਹੁਤ ਹੀ ਦੁਰਲੱਭ ਨਸਲ ਹੈ ਤੇ ਬਿਲਕੁਲ ਬਘਿਆੜ ਵਰਗਾ ਦਿਖਾਈ ਦਿੰਦੀ ਹੈ।’ ਇਸ ਨਸਲ ਦਾ ਕੁੱਤਾ ਦੁਨੀਆ ਵਿੱਚ ਪਹਿਲਾਂ ਕਦੇ ਨਹੀਂ ਵਿਕਿਆ। ਇਸ ਕੁੱਤੇ ਨੂੰ ਅਮਰੀਕਾ ਵਿੱਚ ਪਾਲਿਆ ਗਿਆ ਸੀ ਤੇ ਇਹ ਬਹੁਤ ਹੀ ਵਿਲੱਖਣ ਹੈ। ਮੈਂ ਇਸ ਕਤੂਰੇ ਨੂੰ ਖਰੀਦਣ ਲਈ 50 ਮਿਲੀਅਨ ਰੁਪਏ ਖਰਚ ਕੀਤੇ ਕਿਉਂਕਿ ਮੈਨੂੰ ਕੁੱਤਿਆਂ ਦਾ ਬਹੁਤ ਸ਼ੌਕ ਹੈ ਤੇ ਮੈਨੂੰ ਵਿਲੱਖਣ ਕੁੱਤਿਆਂ ਦੀ ਨਸਲ ਪੈਦਾ ਕਰਨਾ ਅਤੇ ਉਨ੍ਹਾਂ ਨੂੰ ਭਾਰਤ ਲਿਆਉਣਾ ਬਹੁਤ ਪਸੰਦ ਹੈ।

ਸਤੀਸ਼ ਨੇ ਕਿਹਾ, ‘ਮੈਂ ਇਨ੍ਹਾਂ ਕੁੱਤਿਆਂ ‘ਤੇ ਪੈਸੇ ਖਰਚ ਕੀਤੇ ਕਿਉਂਕਿ ਇਹ ਬਹੁਤ ਘੱਟ ਮਿਲਦੇ ਹਨ।’ ਇਸ ਤੋਂ ਇਲਾਵਾ ਮੈਨੂੰ ਕਾਫ਼ੀ ਪੈਸੇ ਮਿਲਦੇ ਹਨ ਕਿਉਂਕਿ ਲੋਕ ਹਮੇਸ਼ਾ ਉਨ੍ਹਾਂ ਨੂੰ ਦੇਖਣ ਲਈ ਉਤਸੁਕ ਰਹਿੰਦੇ ਹਨ। ਉਹ ਸੈਲਫ਼ੀਆਂ ਅਤੇ ਤਸਵੀਰਾਂ ਖਿੱਚਦੇ ਹਨ। ਮੈਨੂੰ ਤੇ ਮੇਰੇ ਕੁੱਤੇ ਨੂੰ ਫਿਲਮ ਸਕ੍ਰੀਨਿੰਗ ‘ਤੇ ਇੱਕ ਅਦਾਕਾਰ ਨਾਲੋਂ ਵੱਧ ਧਿਆਨ ਮਿਲਦਾ ਹੈ, ਅਸੀਂ ਦੋਵੇਂ ਭੀੜ ਖਿੱਚਣ ਵਾਲੇ ਹਾਂ।