Entertainment
ਦਲੇਰ ਮਹਿੰਦੀ ਦੀ ਚੱਲਦੇ ਸ਼ੋਅ ਦੌਰਾਨ ਮੰਤਰੀ ਨੇ ਕਿਹਾ ‘ਤੁਸੀਂ ਸਾਨੂੰ ਬੇਵਕੂਫ਼ ਬਣਾ ਰਹੇ ਓ’ ਰੋਕੋ!
ਉਤਰਾਖੰਡ ਦੇ ਟਿਹਰੀ ਗੜ੍ਹਵਾਲ ਜ਼ਿਲ੍ਹੇ ਦੇ ਨਰਿੰਦਰਨਗਰ ਵਿੱਚ ਆਯੋਜਿਤ ਕੁੰਜਾਪੁਰੀ ਮੇਲੇ ਵਿੱਚ ਪੰਜਾਬੀ ਗਾਇਕ ਦਲੇਰ ਮਹਿੰਦੀ ਦੇ ਲਾਈਵ ਪ੍ਰਦਰਸ਼ਨ ਦੌਰਾਨ ਹੰਗਾਮਾ ਹੋ ਗਿਆ। ਇਸ ਪ੍ਰੋਗਰਾਮ ਦੌਰਾਨ ਉਤਰਾਖੰਡ ਦੇ ਕੈਬਨਿਟ ਮੰਤਰੀ ਅਤੇ ਸਥਾਨਕ ਵਿਧਾਇਕ ਸੁਬੋਧ ਉਨਿਆਲ ਸਟੇਜ ‘ਤੇ ਪਹੁੰਚੇ। ਉਨ੍ਹਾਂ ਨੇ ਗਾਇਕ ਦੇ ਪ੍ਰਦਰਸ਼ਨ ਤੋਂ ਨਾਰਾਜ਼ਗੀ ਜ਼ਾਹਰ ਕੀਤੀ ਅਤੇ ਮਿਕਸਰ ਰਾਹੀਂ ਗਾਣੇ ‘ਤੇ ਸਵਾਲ ਉਠਾਏ। ਘਟਨਾ ਦਾ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਿਹਾ ਹੈ।
ਵਾਇਰਲ ਵੀਡੀਓ ਮੁਤਾਬਕ, ਮੰਤਰੀ ਸੁਬੋਧ ਉਨਿਆਲ ਨੇ ਦਲੇਰ ਮਹਿੰਦੀ ਨੂੰ ਸਟੇਜ ‘ਤੇ ਟੋਕਦੇ ਹੋਏ ਕਿਹਾ ਕਿ ਅਸੀਂ ਤੂਹਾਨੂੰ ਐਨੇ ਪੈਸੇ ਦੇ ਕੇ ਲਾਈਵ ਪ੍ਰਦਰਸ਼ਨ ਲਈ ਸੱਦਿਆ ਏ, ਪਰ ਤੁਸੀਂ ਆਪਣਾ ਗੀਤ ਗਾਉਣ ਦੀ ਬਜਾਏ ਟਰੈਕ ਦੀ ਵਰਤੋਂ ਕਰ ਰਹੇ ਹੋ। ਮੰਤਰੀ ਨੇ ਨਾਰਾਜ਼ਗੀ ਜ਼ਾਹਰ ਕਰਦੇ ਹੋਏ ਕਿਹਾ, “ਤੁਹਾਡੇ ਤੋਂ ਬੋਲਿਆ ਤਾਂ ਜਾ ਨਹੀਂ ਰਿਹਾ, ਤੁਸੀਂ ਗਾਣਾ ਕੀ ਗਾਓਗੇ? ਲੋਕਾਂ ਨੂੰ ਬੇਵਕੂਫ ਬਣਾ ਰਹੇ ਓ।” ਇਸ ਦੌਰਾਨ, ਗਾਇਕ ਆਪਣੀ ਗੱਲ ਰੱਖਣ ਅਤੇ ਸਥਿਤੀ ਨੂੰ ਸੰਭਾਲਣ ਦੀ ਕੋਸ਼ਿਸ਼ ਕਰਦੇ ਨਜ਼ਰ ਆਏ।
ਦੱਸ ਦੇਈਏ ਕਿ ਕੁੰਜਾਪੁਰੀ ਮੇਲਾ ਨਵਰਾਤਰੀ ਦੌਰਾਨ ਆਯੋਜਿਤ ਇੱਕ ਧਾਰਮਿਕ ਅਤੇ ਸੱਭਿਆਚਾਰਕ ਸਮਾਗਮ ਹੈ। ਮੰਤਰੀ ਨੇ ਸਮਾਗਮ ਵਿੱਚ ਗਾਇਕ ਦੇ ਪ੍ਰਦਰਸ਼ਨ ‘ਤੇ ਨਾਰਾਜ਼ਗੀ ਜ਼ਾਹਰ ਕੀਤੀ।
