ਸਵਾਲ 1: ਦੀਪਕ ਟੀਨੂੰ ਨੂੰ ਪ੍ਰਿਤਪਾਲ ਸਿੰਘ ਕਿਉਂ ਆਪਣੇ ਨਾਲ ਲੈ ਕੇ ਗਿਆ ?
ਪੁਲਿਸ ਮੁਤਾਬਕ ਇਸ ਮੁੱਦੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਇਸ ਤੋਂ ਇਲਾਵਾ ਮਾਨਸਾ ਪੁਲਿਸ ਫਿਲਹਾਲ ਕੁਝ ਵੀ ਨਹੀਂ ਬੋਲ ਰਹੀ।
ਟੀਨੂੰ ਦੇ ਫ਼ਰਾਰ ਹੋਣ ਤੋਂ ਬਾਅਦ ਮਾਨਸਾ ਪੁਲਿਸ ਨੇ ਜੋ ਐਫਆਈਆਰ ਦਰਜ ਕੀਤੀ ਹੈ, ਇਸ ਵਿੱਚ ਇਸ ਗੱਲ ਦਾ ਜ਼ਿਕਰ ਕੀਤਾ ਗਿਆ ਹੈ ਕਿ ਪ੍ਰਿਤਪਾਲ ਸਿੰਘ ਦੀਪਕ ਟੀਨੂੰ ਕਿਉਂ ਲੈ ਗਿਆ।
ਐਫਆਈਆਰ ਦੀ ਕਾਪੀ ਦੇ ਦਾਅਵੇ ਮੁਤਾਬਕ ਪ੍ਰਿਤਪਾਲ ਸਿੰਘ ਹਥਿਆਰਾਂ ਦੀ ਬਰਾਮਦਗੀ ਲਈ ਟੀਨੂੰ ਨੂੰ ਸੀਆਈਏ ਸਟਾਫ਼ ਤੋਂ ਬਾਹਰ ਲੈ ਕੇ ਗਿਆ, ਜਿੱਥੋਂ ਉਹ ਭੱਜ ਗਿਆ।
ਸਵਾਲ 2 : ਪ੍ਰਿਤਪਾਲ ਸਿੰਘ ਆਪਣੀ ਨਿੱਜੀ ਕਾਰ ਵਿੱਚ ਦੀਪਕ ਟੀਨੂੰ ਨੂੰ ਕਿਉਂ ਲੈ ਕੇ ਗਿਆ ?
ਆਮ ਤੌਰ ਉਤੇ ਪੁਲਿਸ ਜਦੋਂ ਕੋਈ ਵਿਅਕਤੀ ਪੁਲਿਸ ਰਿਮਾਂਡ ਉਤੇ ਹੁੰਦਾ ਹੈ ਤਾਂ ਪੁਲਿਸ ਉਸ ਨੂੰ ਬਰਾਮਦਗੀ ਕਰਵਾਉਣ ਲਈ ਥਾਣੇ ਤੋਂ ਬਾਹਰ ਲੈ ਕੇ ਜਾ ਸਕਦੀ ਹੈ।
ਇਸ ਦੇ ਲਈ ਸੀਨੀਅਰ ਅਧਿਕਾਰੀਆਂ ਨੂੰ ਸੂਚਿਤ ਨੂੰ ਪਹਿਲਾਂ ਸੂਚਿਤ ਕਰਨਾ ਬਣਦਾ ਹੈ ਅਤੇ ਪੂਰੀ ਸੁਰਖਿਆ ਦੇ ਨਾਲ ਥਾਣੇ ਤੋਂ ਬਾਹਰ ਮੁਲਜ਼ਮ ਨੂੰ ਲਿਜਾਇਆ ਜਾਂਦਾ ਹੈ। ਪਰ ਟੀਨੂੰ ਦੇ ਮਾਮਲੇ ਵਿੱਚ ਅਜਿਹਾ ਨਹੀਂ ਹੈ।
ਮਾਨਸਾ ਦੇ ਐਸ ਐਸ ਪੀ ਗੌਰਵ ਤੂਰਾ ਮੁਤਾਬਕ ਪ੍ਰਿਤਪਾਲ ਸਿੰਘ ਨੇ ਕਿਸੇ ਵੀ ਸੀਨੀਅਰ ਅਫ਼ਸਰ ਨੂੰ ਸੂਚਿਤ ਨਹੀਂ ਕੀਤਾ ਕਿ ਉਹ ਟੀਨੂੰ ਸੀਆਈਏ ਸਟਾਫ਼ ਤੋਂ ਆਪਣੀ ਨਿੱਜੀ ਕਾਰ ਵਿੱਚ ਬਾਹਰ ਲੈ ਕੇ ਜਾ ਰਿਹਾ ਹੈ ਜਿਥੋਂ ਉਹ ਫਰਾਰ ਹੋ ਗਿਆ।
ਪੰਜਾਬ ਪੁਲਿਸ ਇਸ ਨੂੰ ਪ੍ਰਿਤਪਾਲ ਸਿੰਘ ਦੀ ਸਾਜ਼ਿਸ ਦੱਸ ਰਹੀ ਹੈ ਅਤੇ ਇਸੇ ਕਰਕੇ ਉਸ ਦੇ ਖਿਲਾਫ ਐਫਆਈਆਰ ਦਰਜ ਕਰਕੇ ਉਸ ਨੂੰ ਗਿਫਤਾਰ ਕਰ ਲਿਆ ਗਿਆ ਹੈ।
ਸਵਾਲ 3: ਦੀਪਕ ਟੀਨੂੰ ਕਿਥੋਂ ਫਰਾਰ ਹੋਇਆ ?
ਦੀਪਕ ਟੀਨੂੰ ਦੇ ਫਰਾਰ ਹੋਣ ਨੂੰ ਲੈ ਕੇ ਸੋਸਲ ਮੀਡੀਆ ਉਤੇ ਵੱਖ ਵੱਖ ਗੱਲਾਂ ਆਖੀਆਂ ਜਾ ਰਹੀਆਂ ਹਨ।
ਮੀਡੀਆ ਦਾ ਇੱਕ ਹਿੱਸਾ ਦਾਅਵਾ ਕਰ ਰਿਹਾ ਹੈ ਕਿ ਦੀਪਕ ਟੀਨੂੰ ਨੂੰ ਉਸਦੀ ਮਹਿਲਾ ਮਿੱਤਰ ਨੂੰ ਮਿਲਾਉਣ ਲਈ ਹੋਟਲ ਵਿੱਚ ਲਿਜਾਇਆ ਗਿਆ ਸੀ, ਜਿਥੋਂ ਉਹ ਉਸ ਨਾਲ ਫਰਾਰ ਹੋ ਗਿਆ।
ਐਫਆਈਆਰ ਵਿੱਚ ਵੀ ਇਸ ਗੱਲ ਦਾ ਜਿਕਰ ਨਹੀਂ ਕਿ ਦੀਪਕ ਟੀਨੂੰ ਕਿਸ ਥਾਂ ਤੋਂ ਫਰਾਰ ਹੋਇਆ।
ਮਾਨਸਾ ਦੇ ਐੱਸਐੱਸਪੀ ਗੌਰਵ ਤੂਰਾ ਨੇ ਆਖਿਆ ਕਿ ਵੱਖ ਵੱਖ ਥਾਵਾਂ ਤੋਂ ਸੀਸੀਟੀਵੀ ਦੀ ਫੁਟੇਜ ਇਕੱਠੀ ਕਰ ਲਈ ਗਈ ਹੈ ਅਤੇ ਜਾਂਚ ਕੀਤੀ ਜਾ ਰਹੀ ਹੈ ਆਖਰਕਾਰ ਟੀਨੂੰ ਕਿਸ ਥਾਂ ਤੋਂ ਫਰਾਰ ਹੋਇਆ।
ਉਹਨਾਂ ਆਖਿਆ ਕਿ ਐੱਫਆਈਆਰ ਵਿੱਚ ਵੀ ਇਸੇ ਕਰਕੇ ਟੀਨੂੰ ਦੇ ਫਰਾਰ ਹੋਣ ਵਾਲੀ ਥਾਂ ਦਾ ਜਿਕਰ ਨਹੀਂ ਹੈ।
ਸਵਾਲ 4: ਸੀਆਈਏ ਸਟਾਫ ਤੋਂ ਟੀਨੂੰ ਨੂੰ ਬਾਹਰ ਲੈ ਕੇ ਜਾਣ ਦੀ ਹੋਰ ਕਿਸ ਨੂੰ ਜਾਣਕਾਰੀ ਸੀ?
ਮਾਨਸਾ ਪੁਲਿਸ ਮੁਤਾਬਕ ਪ੍ਰਿਤਪਾਲ ਸਿੰਘ ਰਾਤ ਸਮੇਂ ਆਪਣੀ ਨਿੱਜੀ ਕਾਰ ਵਿੱਚ ਦੀਪਕ ਟੀਨੂੰ ਨੂੰ ਲੈ ਕੇ ਗਿਆ।
ਇਸ ਬਾਰੇ ਐੱਸਐੱਸਪੀ ਮਾਨਸਾ ਗੌਰਵ ਤੂਰਾ ਦਾ ਕਹਿਣਾ ਹੈ ਕਿ ਪ੍ਰਿਤਪਾਲ ਸਿੰਘ ਨੇ ਇਸ ਸਬੰਧ ਵਿੱਚ ਕਿਸੇ ਨੂੰ ਵੀ ਸੂਚਿਤ ਨਹੀਂ ਕੀਤਾ ਸੀ।
ਮਾਨਸਾ ਪੁਲਿਸ ਇਸ ਨੂੰ ਪ੍ਰਿਤਪਾਲ ਸਿੰਘ ਦੀ ਸਾਜ਼ਿਸ ਮੰਨ ਰਹੀ ਹੈ ਅਤੇ ਗੱਲ ਐੱਫਆਈਆਰ ਵਿੱਚ ਵੀ ਦਰਜ ਹੈ।
ਪਰ ਇਸ ਸਵਾਲ ਦਾ ਪੁਲਿਸ ਕੋਲ ਕੋਈ ਜਵਾਬ ਨਹੀ ਹੈ ਕਿ ਜਦੋਂ ਟੀਨੂੰ ਨੂੰ ਬਾਹਰ ਲਿਜਾਇਆ ਗਿਆ ਤਾਂ ਥਾਣੇ ਤੈਨਾਤ ਮੁਲਾਜ਼ਮ ਕਿੱਥੇ ਸਨ, ਉਨ੍ਹਾਂ ਨੂੰ ਜਾਣਕਾਰੀ ਕਿਉਂ ਨਹੀਂ ਸੀ।
ਸਵਾਲ 5: ਦੀਪਕ ਟੀਨੂੰ ਨੇ ਭੱਜਣ ਲਈ ਇਸ ਵਾਰ ਕਿਹੜਾ ਤਰੀਕਾ ਅਪਣਾਇਆ
ਦੀਪਕ ਟੀਨੂੰ ਪਹਿਲੀ ਵਾਰ ਪੁਲਿਸ ਦੀ ਗ੍ਰਿਫਤ ਤੋਂ ਬਾਹਰ ਨਹੀਂ ਹੋਇਆ।
29 ਸਾਲਾ ਦੀਪਕ ਇਸ ਤੋਂ ਪਹਿਲਾਂ ਹਰਿਆਣਾ ਪੁਲਿਸ ਦੀ ਗ੍ਰਿਫਤ ਵਿਚੋਂ 2017 ਵਿਚੋਂ ਉਸ ਸਮੇਂ ਫ਼ਰਾਰ ਹੋ ਗਿਆ ਸੀ ਜਦੋਂ ਉਸ ਨੂੰ ਅੰਬਾਲਾ ਦੀ ਜੇਲ੍ਹ ਵਿਚੋਂ ਪੰਚਕੂਲਾ ਦੇ ਹਸਪਤਾਲ ਵਿੱਚ ਮੈਡੀਕਲ ਚੈੱਕਅਪ ਲਈ ਲਿਆਂਦਾ ਗਿਆ ਸੀ।
ਬਾਅਦ ਵਿੱਚ ਹਰਿਆਣਾ ਪੁਲਿਸ ਨੇ ਉਸ ਨੂੰ ਫਿਰ ਤੋਂ ਬੰਗਲੌਰ ਤੋਂ ਗ੍ਰਿਫਤ ਕਰ ਲਿਆ ਸੀ।
ਉਦੋਂ ਟੀਨੂੰ ਪੁਲਿਸ ਵਾਲਿਆਂ ਦੀ ਅੱਖਾਂ ਵਿਚ ਮਿਰਚਾਂ ਪਾ ਕੇ ਭੱਜ ਗਿਆ ਸੀ, ਪਰ ਇਸ ਵਾਰ ਭੱਜਣ ਵੇਲ਼ੇ ਉਸ ਨੇ ਕੀ ਕੀਤਾ।
ਭਾਵੇਂ ਕਿ ਕੁਝ ਰਿਪੋਰਟਾਂ ਵਿਚ ਇਹ ਵੀ ਕਿਹਾ ਜਾ ਰਿਹਾ ਹੈ ਕਿ ਉਹ ਪ੍ਰਿਤਪਾਲ ਤੋਂ ਉਸਦਾ ਹਥਿਆਰ ਖੋਹ ਕੇ ਭੱਜ ਗਿਆ, ਪਰ ਇਸ ਦੀ ਅਧਿਕਾਰਤ ਤੌਰ ਉੱਤੇ ਪੁਸ਼ਟੀ ਨਹੀਂ ਹੋਈ ਹੈ।
ਦੀਪਕ ਟੀਨੂੰ ਦਾ ਕੀ ਹੈ, ਸਿੱਧੂ ਮੂਸੇਵਾਲ ਕਤਲ ਕੇਸ ਨਾਲ ਸਬੰਧ
ਦੀਪਕ ਟੀਨੂੰ ਦਾ ਸਬੰਧ ਨਾਮੀ ਗੈਂਗਸਟਰ ਲਾਰੈਂਸ ਬਿਸੋਨਈ ਨਾਲ ਹੈ।
ਦੀਪਕ ਟੀਨੂੰ ਹੱਤਿਆ ਅਤੇ ਹੋਰ ਕਈ ਮਾਮਲਿਆਂ ਵਿੱਚ ਪੰਜਾਬ ਪੁਲਿਸ ਨੂੰ ਲੋੜੀਂਦਾ ਸੀ ਅਤੇ ਮਾਨਸਾ ਤੋਂ ਪਹਿਲਾਂ ਉਹ ਗੋਇੰਦਵਾਲ ਦੀ ਜੇਲ੍ਹ ਵਿੱਚ ਬੰਦ ਸੀ।
ਦੀਪਕ ਟੀਨੂੰ ਨੂੰ ਸਿੱਧੂ ਮੂਸੇਵਾਲ ਕਤਲ ਦੇ ਸਬੰਧ ਵਿੱਚ ਗੋਇੰਦਵਾਲ ਸਾਹਿਬ ਦੀ ਜੇਲ੍ਹ ਤੋਂ ਪੁੱਛਗਿੱਛ ਲਈ ਪ੍ਰੋਡਕਸ਼ਨ ਵਾਰੰਟ ਉੱਪਰ ਮਾਨਸਾ ਲਿਆਂਦਾ ਗਿਆ ਸੀ।
ਮਾਨਸਾ ਪੁਲਿਸ ਮੁਤਾਬਕ ਉਸ ਨੇ ਸਿੱਧੂ ਦੇ ਕਾਤਲਾਂ ਦੀ ਮਦਦ ਕੀਤੀ ਸੀ ਅਤੇ ਇਸੇ ਮਾਮਲੇ ਵਿੱਚ ਉਸ ਨੂੰ ਪੁਛਗਿੱਛ ਲਈ ਮਾਨਸਾ ਸੀਆਈਏ ਸਟਾਫ ਲਿਆਂਦਾ ਗਿਆ ਸੀ।
