ਜਲੰਧਰ ਧਮਾਕੇ ਮਾਮਲੇ ਵਿੱਚ ਵੱਡਾ ਖੁਲਾਸਾ, ਕੇਂਦਰੀ ਅਤੇ ਪੰਜਾਬ ਦੀਆਂ ਜਾਂਚ ਏਜੰਸੀਆਂ ਨੇ ਸ਼ਹਿਰ ’ਚ ਡੇਰਾ ਲਾਇਆ

Big revelation in Jalandhar blast case, central and Punjab investigation agencies camped in the city

ਜਲੰਧਰ ਦੇ ਬੀ. ਐੱਸ. ਐੱਫ਼. ਚੌਕ ’ਚ ਸਥਿਤ ਬੀ. ਐੱਸ. ਐੱਫ਼. ਹੈੱਡਕੁਆਰਟਰ ਦੇ ਬਾਹਰ ਹੋਇਆ ਬਲਾਸਟ ਆਈ. ਈ. ਡੀ. ਨਾਲ ਕੀਤਾ ਗਿਆ ਸੀ। ਹਾਲਾਂਕਿ ਆਈ. ਈ. ਡੀ. ਦੀ ਮਾਤਰਾ ਘੱਟ ਸੀ, ਜਿਸ ਕਾਰਨ ਕਿਸੇ ਕਿਸਮ ਦਾ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ। ਬੁੱਧਵਾਰ ਨੂੰ ਡੀ. ਜੀ. ਪੀ. ਗੌਰਵ ਯਾਦਵ ਬੀ. ਐੱਸ. ਐੱਫ਼. ਦੇ ਹੈੱਡਕੁਆਰਟਰ ਪਹੁੰਚੇ ਅਤੇ ਘਟਨਾ ਸਥਾਨ ਦਾ ਜਾਇਜ਼ਾ ਲੈ ਕੇ ਮਹਿਜ਼ ਅੱਧੇ ਘੰਟੇ ਬਾਅਦ ਹੀ ਬਿਨਾਂ ਪ੍ਰੈੱਸ ਕਾਨਫ਼ਰੰਸ ਕੀਤੇ ਚਲੇ ਗਏ। ਹਾਲਾਂਕਿ ਡੀ. ਜੀ. ਪੀ. ਨੇ ਅੰਮ੍ਰਿਤਸਰ ’ਚ ਕੀਤੀ ਪ੍ਰੈੱਸ ਕਾਨਫ਼ਰੰਸ ਦੌਰਾਨ ਕਿਹਾ ਕਿ ਜਲੰਧਰ ’ਚ ਹੋਇਆ ਧਮਾਕਾ ਰਿਮੋਟ ਜਾਂ ਟਾਈਮਰ ਦੀ ਮਦਦ ਨਾਲ ਕੀਤਾ ਹੋ ਸਕਦਾ ਹੈ। ਉਥੇ ਹੀ ਇਸ ਧਮਾਕੇ ਬਾਰੇ ਕਈ ਹੈਰਾਨੀਜਨਕ ਗੱਲਾਂ ਸਾਹਮਣੇ ਆ ਰਹੀਆਂ ਹਨ।

ਡੀ. ਜੀ. ਪੀ. ਦੇ ਜਾਣ ਤੋਂ ਬਾਅਦ ਪੁਲਸ ਕਮਿਸ਼ਨਰ ਧਨਪ੍ਰੀਤ ਕੌਰ ਨੇ ਮੀਡੀਆ ਨਾਲ ਅਹਿਮ ਜਾਣਕਾਰੀਆਂ ਸਾਂਝੀਆਂ ਕੀਤੀਆਂ। ਸੀ. ਪੀ. ਨੇ ਕਿਹਾ ਕਿ ਧਮਾਕਾ ਕਰਨ ਲਈ ਧਮਾਕਾਖੇਜ਼ ਸਮੱਗਰੀ ਦੀ ਵਰਤੋਂ ਹੋਈ ਹੈ। ਉਨ੍ਹਾਂ ਕਿਹਾ ਕਿ ਫੋਰੈਂਸਿਕ ਟੀਮਾਂ ਨੂੰ ਕਰੀਬ 4 ਵੱਡੀਆਂ ਲੀਡਾਂ ਮਿਲੀਆਂ ਹਨ, ਜਿਨ੍ਹਾਂ ’ਤੇ ਪੁਲਸ ਟੀਮਾਂ ਕੰਮ ਕਰ ਰਹੀਆਂ ਹਨ ਪਰ ਮਲਟੀਪਲ ਸੋਰਸਿਜ਼ ਰਾਹੀਂ ਧਮਾਕਾਖੇਜ਼ ਸਮੱਗਰੀ ਦਾ ਪੈਕੇਟ ਸੁੱਟਣ ਵਾਲੇ ਵਿਅਕਤੀ ਨੂੰ ਟ੍ਰੇਸ ਕੀਤਾ ਜਾ ਰਿਹਾ ਹੈ। ਬੁੱਧਵਾਰ ਸਵੇਰੇ ਪੁਲਸ ਦੀ ਇਕ ਟੀਮ ਮਿਲਾਪ ਚੌਕ ਪਹੁੰਚੀ। ਪੁਲਸ ਸੀ. ਸੀ. ਟੀ. ਵੀ. ਕੈਮਰੇ ਖੰਗਾਲਦੇ ਹੋਏ ਮਿਲਾਪ ਚੌਕ ਪਹੁੰਚੀ ਸੀ, ਜਿੱਥੇ ਪੁਲਸ ਨੇ ਸੈਦਾਂ ਗੇਟ ਵੱਲੋਂ ਪੈਦਲ ਆ ਰਹੇ ਨੌਜਵਾਨ ਦੀਆਂ ਤਸਵੀਰਾਂ ਕੈਪਚਰ ਕੀਤੀਆਂ ਹਨ।

ਸ਼ੱਕ ਹੈ ਕਿ ਉਹੀ ਨੌਜਵਾਨ ਤੰਗ ਬਾਜ਼ਾਰਾਂ ’ਚੋਂ ਨਿਕਲ ਕੇ ਆਟੋ ਜਾਂ ਫਿਰ ਕਿਸੇ ਦੇ ਨਾਲ ਬਾਈਕ ’ਤੇ ਬੈਠ ਕੇ ਬੀ. ਐੱਸ. ਐੱਫ਼. ਚੌਕ ਪਹੁੰਚਿਆ ਅਤੇ ਬੀ. ਐੱਸ. ਐੱਫ਼. ਚੌਕ ਪਾਰ ਕਰਕੇ ਵਾਪਸ ਚੌਕ ਘੁੰਮ ਕੇ ਹੈੱਡਕੁਆਰਟਰ ਦੇ ਬਾਹਰ ਪਹੁੰਚਿਆ ਅਤੇ ਧਮਾਕਾ ਕਰਕੇ ਵਾਪਸ ਪੈਦਲ ਹੀ ਬੱਸ ਸਟੈਂਡ ਵੱਲ ਭੱਜ ਕੇ ਫਿਰ ਪੀ. ਏ. ਪੀ. ਵੱਲ ਭੱਜ ਗਿਆ। ਹਾਲਾਂਕਿ ਇਸ ਦੀ ਕੋਈ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ ਜਾ ਰਹੀ।

ਪੁਲਸ ਕਮਿਸ਼ਨਰ ਧਨਪ੍ਰੀਤ ਕੌਰ ਦਾ ਕਹਿਣਾ ਹੈ ਕਿ ਘਟਨਾ ਸਥਾਨ ਤੋਂ ਕਈ ਗੱਡੀਆਂ ਦੇ ਨੰਬਰ ਅਤੇ ਮੋਬਾਇਲ ਡੰਪ ਡਾਟਾ ਚੁੱਕੇ ਗਏ ਹਨ। ਜਲੰਧਰ ਪੁਲਸ ਦੀਆਂ ਵੱਖ-ਵੱਖ ਟੀਮਾਂ ਕਈ ਅਹਿਮ ਇਨਪੁਟਸ ’ਤੇ ਕੰਮ ਕਰ ਰਹੀਆਂ ਹਨ ਅਤੇ ਜਲਦ ਹੀ ਆਈ. ਈ. ਡੀ. ਦਾ ਪੈਕੇਟ ਸੁੱਟਣ ਵਾਲੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਥਾਣਾ ਨਵੀਂ ਬਾਰਾਦਰੀ ’ਚ ਅਣਪਛਾਤੇ ਲੋਕਾਂ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਗਿਆ ਹੈ।

ਸਵੇਰੇ ਸੀ. ਐੱਫ਼. ਐੱਸ. ਐੱਲ. ਨੇ ਸਬੂਤ ਇਕੱਠੇ ਕੀਤੇ ਤਾਂ ਦੁਪਹਿਰ ਨੂੰ ਐੱਨ. ਆਈ. ਏ. ਨੇ ਜਾਂਚ ਕੀਤੀ ਸ਼ੁਰੂ
ਦੂਜੇ ਪਾਸੇ ਇਸ ਕੇਸ ਦੀ ਜਾਂਚ ਲਈ ਬੁੱਧਵਾਰ ਸਵੇਰੇ ਸੀ. ਐੱਫ਼. ਐੱਸ. ਐੱਲ. (ਸੈਂਟਰਲ ਫੋਰੈਂਸਿਕ ਟੀਮ) ਦੀ ਟੀਮ ਬੀ. ਐੱਸ. ਐੱਫ਼. ਹੈੱਡਕੁਆਰਟਰ ਦੇ ਬਾਹਰ ਪਹੁੰਚੀ। ਸੀ. ਐੱਫ਼. ਐੱਸ. ਐੱਲ. ਨੇ ਵੀ ਅਹਿਮ ਸਬੂਤ ਜੁਟਾਏ ਹਨ ਅਤੇ ਫਿਰ ਦੁਪਹਿਰ ਵੇਲੇ ਬਲਾਸਟ ਮਾਮਲੇ ’ਚ ਐੱਨ. ਆਈ. ਏ. ਦੀ ਵੀ ਐਂਟਰੀ ਹੋ ਗਈ। ਪੁਲਸ ਦੇ ਨਾਲ-ਨਾਲ ਬੀ. ਐੱਸ. ਐੱਫ਼. ਦੇ ਉੱਚ ਅਧਿਕਾਰੀ ਵੀ ਇਸ ਕੇਸ ’ਤੇ ਨਜ਼ਰ ਬਣਾਈ ਬੈਠੇ ਹਨ।

ਇਸ ਦੌਰਾਨ ਪੰਜਾਬ ਪੁਲਸ ਨੇ ਵਿਸਫੋਟਕ ਸਪਲਾਇਰ ਨੂੰ ਫੜਨ ਦਾ ਦਾਅਵਾ ਕੀਤਾ ਹੈ। ਉਨ੍ਹਾਂ ਨੇ ਉਸ ਨੂੰ ਜਮਸ਼ੇਰ ਖੇਤਰ ਤੋਂ ਗ੍ਰਿਫ਼ਤਾਰ ਕਰਨ ਦਾ ਦਾਅਵਾ ਕੀਤਾ ਹੈ, ਜਿਸ ਦੀ ਪਛਾਣ ਦਵਿੰਦਰ ਵਜੋਂ ਹੋਈ ਹੈ, ਜੋ ਨਵਾਂਸ਼ਹਿਰ ਦੇ ਬੰਗਾ ਦਾ ਰਹਿਣ ਵਾਲਾ ਹੈ। ਪੁੱਛਗਿੱਛ ਦੌਰਾਨ ਦੋਸ਼ੀ ਨੇ ਚੰਡੀਗੜ੍ਹ ਵਿੱਚ ਭਾਜਪਾ ਹੈੱਡਕੁਆਰਟਰ ਦੇ ਬਾਹਰ ਹਾਲ ਹੀ ਵਿੱਚ ਹੋਏ ਗ੍ਰਨੇਡ ਹਮਲੇ ਵਿੱਚ ਵਰਤੇ ਗਏ ਗ੍ਰਨੇਡ ਸਪਲਾਈ ਕਰਨ ਦੀ ਗੱਲ ਕਬੂਲ ਕੀਤੀ। ਉਸ ਨੂੰ ਡਰੋਨ ਰਾਹੀਂ ਪਾਕਿਸਤਾਨ ਤੋਂ ਵਿਸਫੋਟਕ ਮਿਲਦੇ ਹਨ, ਜਿਸ ਨੂੰ ਉਹ ਫਿਰ ਸਪਲਾਈ ਕਰਦਾ ਹੈ। ਜਲੰਧਰ ਧਮਾਕੇ ਦੀ ਇਕ ਹੋਰ ਵੀਡੀਓ ਸਾਹਮਣੇ ਆਈ ਹੈ। ਇਸ ‘ਚ ਇਕ ਪੱਗ ਵਾਲਾ ਆਦਮੀ ਮੋਟਰਸਾਈਕਲ ‘ਤੇ ਆਉਂਦਾ ਹੈ ਅਤੇ ਧਮਾਕੇ ਵਾਲੀ ਥਾਂ ‘ਤੇ ਰੁਕਦਾ ਹੈ। ਉਹ ਥੋੜ੍ਹੀ ਦੇਰ ਬਾਅਦ ਚਲਾ ਜਾਂਦਾ ਹੈ ਅਤੇ ਧਮਾਕਾ ਉਸ ਦੇ ਜਾਣ ਤੋਂ 15 ਸਕਿੰਟ ਬਾਅਦ ਹੁੰਦਾ ਹੈ।

ਆਪ੍ਰੇਸ਼ਨ ਸਿੰਧੂਰ ਦੀ ਐਨੀਵਰਸਰੀ ’ਤੇ ਮਾਹੌਲ ਖ਼ਰਾਬ ਕਰ ਰਿਹਾ ਪਾਕਿਸਤਾਨ
ਪੰਜਾਬ ’ਚ ਪਿਛਲੇ 10 ਦਿਨਾਂ ’ਚ 3 ਧਮਾਕੇ ਹੋ ਚੁੱਕੇ ਹਨ। ਪਹਿਲਾ ਧਮਾਕਾ 27 ਅਪ੍ਰੈਲ ਨੂੰ ਰਾਜਪੁਰਾ ’ਚ ਹੋਇਆ ਸੀ, ਜਿੱਥੇ ਅੱਤਵਾਦੀਆਂ ਨੇ ਰੇਲਵੇ ਟ੍ਰੈਕ ਨੂੰ ਬੰਬ ਨਾਲ ਉਡਾ ਦਿੱਤਾ ਸੀ। ਇਸ ਤੋਂ ਬਾਅਦ 5 ਮਈ ਦੀ ਰਾਤ 8 ਵਜੇ ਬੀ. ਐੱਸ. ਐੱਫ਼. ਹੈੱਡਕੁਆਰਟਰ ਅਤੇ 5 ਮਈ ਦੀ ਹੀ ਦੇਰ ਰਾਤ ਅੰਮ੍ਰਿਤਸਰ ’ਚ ਆਰਮੀ ਕੈਂਪ ਦੇ ਬਾਹਰ ਹੈਂਡ ਗ੍ਰਨੇਡ ਨਾਲ ਧਮਾਕਾ ਕੀਤਾ ਗਿਆ। ਮੰਨਿਆ ਜਾ ਰਿਹਾ ਹੈ ਕਿ ਪਾਕਿਸਤਾਨ ਦੀ ਆਈ. ਐੱਸ. ਆਈ. ਆਪ੍ਰੇਸ਼ਨ ਸਿੰਧੂਰ ਦੀ ਐਨੀਵਰਸਰੀ ’ਤੇ ਪੰਜਾਬ ਦਾ ਮਾਹੌਲ ਖ਼ਰਾਬ ਕਰ ਰਹੀ ਹੈ।

ਕੇਂਦਰੀ ਅਤੇ ਪੰਜਾਬ ਦੀਆਂ ਜਾਂਚ ਏਜੰਸੀਆਂ ਨੇ ਜਲੰਧਰ ’ਚ ਡੇਰਾ ਲਾਇਆ
ਇਸ ਮਾਮਲੇ ਦੀ ਤਫ਼ਤੀਸ਼ ਲਈ ਪੰਜਾਬ ਦੇ ਨਾਲ-ਨਾਲ ਕੇਂਦਰੀ ਜਾਂਚ ਏਜੰਸੀਆਂ ਦੀਆਂ ਟੀਮਾਂ ਨੇ ਜਲੰਧਰ ’ਚ ਡੇਰਾ ਲਾਇਆ ਹੋਇਆ ਹੈ। ਕਮਿਸ਼ਨਰੇਟ ਪੁਲਸ ਦੇ ਨਾਲ-ਨਾਲ ਡੀ. ਜੀ. ਪੀ. ਨੇ ਆਪਣੀਆਂ ਸਪੈਸ਼ਲ ਟੀਮਾਂ ਵੀ ਜਾਂਚ ਲਈ ਫੀਲਡ ’ਚ ਉਤਾਰੀਆਂ ਹੋਈਆਂ ਹਨ। ਧਮਾਕੇ ਦੌਰਾਨ ਜਿਸ-ਜਿਸ ਵਿਅਕਤੀ ਦਾ ਮੋਬਾਇਲ ਨੰਬਰ ਘਟਨਾ ਸਥਾਨ ’ਤੇ ਐਕਟਿਵ ਸੀ, ਉਨ੍ਹਾਂ ਦੀ ਇਕ-ਇਕ ਕਰਕੇ ਜਾਂਚ ਕੀਤੀ ਜਾ ਰਹੀ ਹੈ। ਪੁਲਸ ਨੇ ਕੁਝ ਸ਼ੱਕੀਆਂ ਨੂੰ ਹਿਰਾਸਤ ’ਚ ਵੀ ਲਿਆ ਹੋਇਆ ਹੈ, ਜਿਨ੍ਹਾਂ ’ਚੋਂ ਕੁਝ ਨੂੰ ਪੁੱਛਗਿੱਛ ਤੋਂ ਬਾਅਦ ਛੱਡ ਦਿੱਤਾ ਗਿਆ ਪਰ ਬਾਕੀਆਂ ਤੋਂ ਪੁੱਛਗਿੱਛ ਜਾਰੀ ਹੈ।